O BNG de Noia propón impulsar saneamentos, accesibilidade e transformación tecnolóxica co POS 2021 da Deputación

O BNG de Noia vén de rexistrar unha proposta de investimentos para os 593.000 euros do Plan de Obras e Servizos (POS) 2021 da Deputación de A Coruña, para que, de ser estimada total ou parcialmente, “os servizos técnicos municipais teñan tempo para realizar as memorias xustificativas e revisar as cantidades exactas dos investimentos”.

As propostas dos nacionalistas céntranse no saneamento, para o que propoñen actuacións por valor de 412.000 euros nos lugares de Ousoño e O Gradil (A Barquiña).

Ademais tamén apostan pola mellora da accesibilidade cun elevador na biblioteca da Casa da Cultura Antón Avilés de Taramancos con 66.000 euros, unha páxina web e aplicación para móbiles accesíbel e de balde para os establecementos de comercio e hostalería que facilite a comercialización a domicilio con 8.000 euros e un plan de axudas para a adquisición de material informático por parte do alumnado de Noia con 74.000 euros.

En palabras do portavoz da formación, Ricardo Suárez, “con estas propostas reafirmamos a nosa aposta pola calidade das augas, o apoio ao comercio e a hostalería, a igualdade de oportunidades dos alumnado para ter recursos educativos nos seus domicilios e pola accesibilidade nos edificios de servizo público”.