O BNG de Noia solicita a realización dun cribado ao sector marisqueiro da ría

O BNG de Noia estuda a posibilidade de realizar un cribado ao colectivo da Confraría, xa que no próximo mes de febreiro volven ó traballo moitos profesionais do sector. Dende o partido nacionalista explican que “isto sería moi beneficioso para frear a evolución da pandemia”.

Ricardo Suárez, o portavoz dos nacionalistas púxose en contacto co alcalde do municipio noiés, Santiago Freire, para solicitarlle que poña en coñecemento do comité clínico especializado na xestión da COVID a petición de realizar este cribado no ámbito da Confraría, soamente se os expertos o consideran necesario para controlar o virus. De feito, Suárez destacou que “estas decisións lle corresponden en última instancia aos expertos”.

Doutra banda, o portavoz do BNG comentou que “ dito cribado debería ir acompañado de axuda a aqueles profesionais do sector que en caso de confinamento vexan diminuídos os seus ingresos”.