O grupo municipal do BNG de Noia reclamará no vindeiro pleno ordinario (este xoves) a creación dunha plataforma municipal de comercialización que “permita ao empresariado noiés ofertar os seus produtos e servizos a través da web”.
O BNG quere que o tecido empresarial local conte cunha ferramenta nova e innovadora para “facilitar as compras e as reservas de servizos dende os domicilios a través dunha plataforma que recolla aos diferentes sectores da economía noiesa”. Para a formación nacionalista, un recurso tecnolóxico das ditas características faría máis doada a competencia “fronte as grandes empresas que contan cos medios necesarios para desenvolver os seus negocios no ámbito virtual”.
A estratexia que os nacionalistas pretenden que se leve a cabo é a de “fomentar as canles curtas de distribución, coa consecuencia de que tamén deste xeito se permita mellorar o ambiente a través da redución de emisións de CO2 que supón o incremento do consumo local e de proximidade”.
E engade o BNG de Noia: “O contexto actual, agravado pola COVID, no que a capacidade de chegar ás casas é crucial para poder competir, fai máis necesario que nunca este impulso dende a administración a pequenos comerciantes e hostaleiros”.
O BNG tamén achegou as vantaxes de promoción, marca e comunicación que poría en xogo o feito de que a plataforma en cuestión incluíse o idioma galego.
