O Bloque Nacionalista Galego vén de mostrar a súa preocupación con respecto ao avance das obras de reforma da fachada marítima de Noia, que son, en palabras da agrupación nacionalista, “un exemplo de pasividade das administracións estatal e local”. O BNG sostén no seu comunicado que o Goberno central vén de recoñecer “implicitamente” a falta de previsión no proxecto de Adecuación da fachada marítima de Noia, en cuxas obras “veñen de aparecer canalizacións que non aparecían reflectidas nos planos”, reflicten.
O BNG considera “grave” que non se tivera feito un exhaustivo estudo para “asegurarse das condicións dos servizos do subsolo” e cualifican a contestación de “insuficiente”, pois “non valora as importantes consecuencias paisaxísticas e viarias que a falta de previsión das administracións estatal e local están a xerar sobre o municipio de Noia”.
Móstranse dende o BNG tamén críticos e preocupados coa “nula mención á volta do traballo nas obras que remate coa actuación” e din comprender “o enfado cada vez maior dunha veciñanza sen nova algunha sobre a evolución da actuación” cando “fai meses se aseguraba que estaría preparada a comezos do verán”.
Tamén se mostran críticos os nacionalistas co tratamento que se prevé aplicar aos elementos pétreos do dique de Cadarso, así como aos embarcadoiros tradicionais.