Seleccionada en Ribeira a empresa que renovará o treito entre o Caramecheiro e a praza dos Estudantes

O Concello de Ribeira aprobou a clasificación das ofertas para a execución das obras que renovarán os servizos e pavimentación na avenida da Coruña no seu treito entre a ría do Caramecheiro e a praza dos Estudantes. A empresa seleccionada, de entre as 31 ofertas presentadas, foi Bernacle Obras y Servicios, S.L, que comporta un investimento de 225.429 euros.

A actuación inclúe a renovación das beirarrúas en ambas marxes da calzada coa colocación de baldosa de formigón de cores gris escura e branca que suporán un total de 448 metros na marxe esquerda e 404 metros na marxe dereita. Ademais mellorase tanto a rede de pluviais como as de saneamento e auga.

Disporase de tubaxes corrugadas de PVC de 315 milímetros de diámetro en ambos marxes, para as augas pluviais, con colectores de PVC compacto para o saneamento, e tubaxes de PVC de alta densidade para o abastecemento. O prazo de execución das obras son de cinco meses.