A Marea Cidadá de Noia pide que unha parte do Plan Único se adique ao saneamento das augas

A Marea Cidadá de Noia vén de facer un novo chamamento a prol da negociación das iniciativas do Plan Único da Deputación, unha reclamación que, recorda o colectivo, xa vén de antigo. A petición baséase na disconformidade da agrupación noiesa con respecto á presentación de proxectos do dito Plan, que “é unilateral e non axuda a solucionar os problemas da vila”. Tamén advirte de que “non seguirá apoiando proxectos de última hora”.

A agrupación lembra que Noia terá acceso a máis de 550.000 euros en forma de subvencións para obras e mantemento de servizos, os cales a Marea entende que “deberan ir, en gran parte, ao saneamento das augas residuais”. A plataforma denuncia que dende a chegada do actual Goberno local non se negociou “nin un só destes plans anuais” e que “en todos os casos a presentación dos proxectos a última hora obrigou ao resto de partidos a poñerse a favor ou, pola contra, a rexeitar a chegada de ditas subvencións ao Concello”.

A Marea advirte que “aínda hai tempo para negociar o Plan Único deste ano”, e demanda que “unha parte importante del se destine ao saneamento das augas residuais que, agora mesmo, vértense sobre a ría sen o tratamento axeitado”. A agrupación entende que a Ría de Noia e o seu mar constitúen non só a fonte de ingresos máis importante dos nosos veciños e veciñas, senón un dos nosos maiores atractivos turísticos”.