O Concurso de Embelecemento de Balcóns e Fachadas organizado polo Concello da Pobra neste ano 2020 por primeira vez como motivo do Nadal, xa determinou as vivendas premiadas. Así, dun total de 35 fogares inscritos de todo o municipio, foron galardoadas as seguintes vivendas: unha da rúa Atalaia (parroquia de Santa María a Antiga do Caramiñal), outra da Ribeiriña (na parroquia de Santo Isidro de Posmarcos), unha vivenda do lugar das Romeiras (na parroquia de Santa Cruz de Lesón) e outra de Bandaseca (parroquia de Santa María do Xobre).
Desta maneira, os catro fogares recibirán como premio unha cesta composta de produtos locais co fin de contribuír á dinamización e posta en valor do comercio de proximidade. Doutra banda, a edil Charo Varela quixo resaltar a pretensión desta convocatoria: “Con este concurso incrementamos a ledicia e vistosidade das rúas”. Por último, cabe destacar que as vivendas premiadas deben manter a decoración ata o día 6 de xaneiro, para poder recibir o premio.
