O novo circuíto de Pump Truck xa está dispoñíbel para tódolos ciclistas e patinadores tras rematar as obras. O Concello de Ribeira, da man de Construcciones Anspal, construíu un espazo apto para bicicletas e monopatíns de 800 metros cadrados de superficie, con saltos e peraltes, no complexo deportivo da Fieiteira.
O circuíto consta dun trazado total de 100 metros e 1,80 metros de anchura, similar a un boomerang, con curvas e rectas definidas por diferentes obstáculos. Ademais, leváronse a cabo outras melloras no complexo deportivo, como a remodelación da cuberta dun dos vestiarios do campo de fútbol, e a renovación do almacén das pistas de atletismo.
O investimento do circuíto de Pump Truck supuxo un total de 37.510 euros, e 29.645 euros para o vestiario e almacén da Fieiteira. A actuación conta cunha achega por parte da Vicepresidencia e Consellería de Presidencia, Administracións Públicas, que dotan ao Concello dunhas subvencións destinadas para a mellora de infraestruturas vinculadas á prestación de servizos municipais.
