O Concello de Ribeira vén de confirmar que na tarde deste venres 11 de decembro procederase ao acendido dos Beléns municipais de Aguiño e Santa Uxía. Tamén fixo saber que “a diferenza de anos anteriores, por prevención non haberá actos simbólicos de apertura dos mesmos”.
O prendido oficial do Belén de Aguiño está previsto para as 18.30 horas. Unha vez máis cóntase coa colaboración do artista local Miguel Abraldes aportando figuras para o nacemento. Ademais, como novidade, floristas da localidade están a adiantar para o intre da inauguración oficial a decoración ornamental do adro da igrexa onde se sitúa o nacemento de Nadal, tal e como se vai facer en distintas prazas e espazos das diferentes parroquias nos vindeiros días.
No que se refire ao Belén de Santa Uxía, emprazado no Malecón, o acendido será ás 19 horas. “Será un nacemento renovado cunha nova estrutura logo de longos anos de servizo da anterior”, engaden fontes do Concello.
