O BNG de Noia vén de acusar ao Concello de “levar máis de dous anos sen repoñer a praza da traballadora social para a unidade preventiva – asistencial de drogodependentes da localidade”.
Dende o BNG sinalan que “as normas que regulan os servizos socio – sanitarios obrigan a que estes servizos conten con personal médico, psicolóxico e de traballo social”. Así, o partido nacionalista considera que ” a unidade que presta servizo a todos os concellos das comarcas de Muros e Noia, non é valorado polo goberno municipal”.
Os nacionalistas noieses lembran que o pasado mes de febreiro asinaron un acordo co Concello no que este comprometíase a repoñer o posto de traballo social, instaurar un servizo de recepción electrónica automática e retomar os programas de sensibilización, que non se realizaban dende 2013. Porén, a agrupación nacionalista critica agora que “o Goberno municipal non comezou aínda a arranxar os problemas”.
Se ben o Concello explicou que a situación de pandemia que sufrimos dende o mes de marzo provocou “a paralización de determinadas actuacións e o impedimento de varias actividades”, o portavoz do partido nacionalista, Ricardo Suárez, expón que “a crise sanitaria mudou as problemáticas das dependencias facendo máis importante que nunca este servizo”.
