Elefante Elegante levará o seu espectáculo Patapatúm ao Auditorio de Rianxo

O vindeiro sábado 2 de xaneiro ás 19.00 horas a compañía Elefante Elegante estará na sala Arcos Moldes do Auditorio de Rianxo co espectáculo Patapatúm, obra gañadora do Premio María Casares, na categoría de Mellor Espectáculo Infantil 2019. A peza, de 45 minutos e destinada a público infantil e familiar a partir de catro anos, é unha das propostas da Rede Cultural da Deputación da Coruña.

A entrada será de balde, previa solicitude de reserva de localidades no correo auditorio@concelloderianxo.gal ​​​​​​​ou no teléfono 664 183 217, do 21 ao 29 de decembro de 9.00 a 13.30 horas en días laborais.

Trátase dun espectáculo de teatro visual sen palabras que inclúe música dixieland e máscaras e que basea a súa comunicación (estreita) co público a través da marcada expresividade dos personaxes. Patapatúm é unha obra que convida a reflexionar sobre o tempo, a nenez e os métodos que usamos para encher os baleiros das nosas ausencias.