Desvélanse os vídeos premiados no certame noiés NindeBroma

O Concello de Noia, a través da Concellería de Servizos Sociais, vén de dar a coñecer as contribucións finalmente premiadas na campaña NindeBroma, que consistiu nun concurso audiovisual para rapazas e rapaces menores de 18 anos dirixido a estimular a súa creatividade e o seu talento para combater, conxuntamente e nas redes sociais, a lacra da violencia de xénero.

O certame, unha das actividades do programa conmemorativo noiés do pasado 25N, concedeu o primeiro premio ao audiovisual Soy mujer y no hay nada de malo. O segundo premio foi dar a Yo no me callo e o terceiro á curtametraxe 016.

Segundo engaden dende Servizos Sociais de Noia, ao longo destes días realizarase a entrega oficial de galardóns.

Os agasallos ás premiadas serán vales de compra por valor de 200 euros (o primeiro), de 150 (o segundo) e 100 (o terceiro). Segundo se especifica nas bases da iniciativa, os vales deberán ser consumidos en establecementos locais de Noia.