O Concello de Boiro colabora coa Asociación Boirense de Empresarios (ABE) e os demais establecementos comerciantes e hostaleiros do municipio nun vídeo promocional sobre o seu traballo: o vídeo Xuntos, Mellor. Tanto no lanzamento do audiovisual como no seu contido ponse de manifesto o importante labor despregado polo tecido produtivo boirense neste ano marcado pola COVID-19 e as graves consecuencias económicas e sociais xeradas pola pandemia.
A finalidade deste spot é “resaltar a repercusión que o comercio e a hostalería locais teñen no municipio” e transmitir á veciñanza “a importancia que supón, para todos e todas, mercar e consumir nos establecementos locais”.
O Concello explica que o vídeo contou coa colaboración de comerciantes e hostaleiros locais, así como da implicación do grupo boirense Triángulo de Amor Bizarro, que foi o encargado de poñer a música do audiovisual.
Con el, engade o Goberno local, preténdese “mostrar á veciñanza que o tecido económico do municipio é unha gran engrenaxe e que todos e todas formamos parte dela”.
O Concello tamén explica que o vídeo vén a completar a campaña de Nadal impulsada dende o Consistorio e dende a ABE, a prol do comercio e a hostalería locais. Xunto co departamento de cultura municipal programáronse unha serie de actividades para estas festas, pero que “por mor da situación epidemiolóxica tiveron que aprazarse”, explica o Concello, engadindo que das actividades previstas, si se mantén o Escape Room polos comercios do municipio que vai realizarse os días 23, 26, 29 e 30 de decembro, e o día 2 de xaneiro e para o que xa están as inscricións abertas.
A ABE continúa coa campaña de Nadal que consta da entrega de rascas con 3.200 premios directos como paraugas, cuncas, bolsas… ao mercar nos comercios asociados, e un sorteo final do Sueldazo ABE de 300 euros durante 6 meses. A entidade impulsou tamén este nadal o Bono Regalo ABE, unha caixa-agasallo que se pode mercar co importe que se desexe. Xa se levan vendidos máis de 19.500 euros que serán utilizados en preto de 200 establecementos de Boiro.
