As mulleres da Pobra, co-protagonistas dun documental sobre o traballo feminino no rural

A Área de Igualdade da Deputación da Coruña, xunto con representantes dos Concellos da Pobra do Caramiñal, Muxía, Ortigueira, Teo e Aranga, presentou este 23 de decembro un audiovisual destinado a visualizar o importante papel despregado polas mulleres, dende todos os ámbitos (económico, laboral, empresarial, cultural, social), nas nosas vilas, aldeas e núcleos máis miúdos de poboación.

Na presentación (online) do documental O rural de todas participou a deputada de Igualdade, María Muíño, parte das mulleres que protagonizan o audiovisual, as concelleiras de Igualdade de Muxía, Olalla Benlloch; de Teo, María López; da Pobra do Caramiñal, Rosario Varela, o alcalde de Ortigueira, Juan Penabad, ademais da axente de emprego do concello de Aranga, Pilar Laxe.

A presentación retransmitiuse a través do Youtube da Deputación. Nesta mesma canle ficou visíbel o documental, que ás poucas horas de ter sido subido xa amoreaba medio milleiro de reproducións. Nel, destacouse, participan preto de medio cento de persoas. O seu cometido foi “contribuír a unha maior visibilidade do traballo das mulleres do rural a través de historias e experiencias diversas que axudan a unha maior sensibilización sobre a importancia dos traballos que as mulleres desenvolven na sociedade”. A peza está producida por Nova Xestión Cultural / Volvemos a Primera con dirección de Adriana Castro e Pablo Cacheda.