A Marea Cidadá de Noia vai iniciar unha campaña para esixir a gratuidade e o libre uso do céntrico estacionamento Xuíz Falcone. Segundo explica a plataforma, “non se comprenden os porqués de contar cun aparcadoiro pagado con cartos públicos que teña que funcionar cun sistema de aluguer de prazas, negando así o seu uso para a maioría”. Esta reclamación insírese nunha das grandes liñas de actividade da Marea noiesa: reclamar para a cidadanía estruturas, edificacións e proxectos que se financian con cartos públicos.
Para a agrupación, o caso do devandito estacionamento é un caso especialmente grave que supón, nas súas palabras, “unha dobre traizón á veciñanza”. Por unha banda, porque “ten moitas prazas libres de continuo”, polo “que non cumpre a súa función orixinal”, e pola outra porque ao ser de pago “a maioría da xente vese privada dun servizo que xa pagou por adiantado”, explican.
Dende a Marea Cidadá deféndese a necesidade de derogar a actual ordenanza fiscal e
de regulamento referente ó aparcadoiro, e aprobar unha nova ordenanza de
estacionamento temporal limitado e de balde. “Deste xeito, o conxunto da cidadanía poderá
facer uso do aparcadoiro, e cumprirá a súa función de desconxestión e axuda ao pequeno
comercio”, engade a agrupación.
