O Museo de Artes inaugura a mostra Airiños d’a miña terra o 11 decembro

O Museo do Gravado de Artes (Ribeira) acollerá a partir do 11 de decembro a mostra Airiños d’a miña terra, O Gravado V33, que se inaugura nesa mesma xornada de decembro a partir das 20.30 horas, nun acto que debido á actual situación sanitaria virá con aforamento reducido (será preciso reservar entrada no teléfono 981 871 342 ou no correo electrónico fundartes@gmail.com).

A mostra insírese nos actos de conmemoración, este ano 2020, do 140 aniversario da edición do libro de poemas Airiños d’a miña terra, do inmortal bardo galego Curros Enríquez (1851-1908). O Museo, para celebrar a efeméride, preparou unha edición ilustrada da dita obra (un dos cumios do chamado Rexurdimento galego), produto dos obradoiros de gravado impartidos na súa sede de Artes, dirixidos polo catedrático José Fuentes Esteve.