Abreu a campaña da centola e do boi na Coruña e Pontevedra. Aguiño iniciou tamén a campaña do percebe

A Consellería do Mar abre este luns a campaña extractiva da centola e do boi nas provincias da Coruña e Pontevedra. Nas áreas que van da Guarda ata cabo Corrubedo (na provincia de Pontevedra) e de cabo Corrubedo ata cabo Estaca de Bares (na provincia da Coruña), a frota que se dedica á extracción destas especies pode calar os aparellos a partir da madrugada e levar as especies á lonxa.
A campaña destes crustáceos nas dúas provincias prolongarase ata o inicio da veda do ano 2021, que se fixará a través do correspondente plan de xestión.
A cota máxima de captura de cada unha destas especies será de 35 quilos por barco e día, á que se lle engadirán 35 quilos ao día por cada tripulante enrolado e a bordo. Poderán participar na campaña todas as embarcacións de artes menores e con porto base nesta comunidade así como aquelas que, tendo porto base noutras comunidades autónomas, teñan permisos especiais de pesca para faenar nestas augas.

Pola súa banda a confradía de Aguiño decretou para este luns a apertura da campaña de invierno. Debido ás mareas non se poderá saír a faenar ata as catro da tarde e a poxa prevese que arranque sobre as sete e media. Cada produtor terá un tope diario de cinco quilogramos, aínda que esta cota aumentará no mes de decembro para aproveitar as festas.