O Concello de Ribeira avisa da adxudicación provisional da actuación que consiste na pavimentación e reordenación do parque infantil do Colexio de Artes, que conta cun prazo de realización de 2 meses.
O obxectivo da reforma sería ampliar a zona de xogos e colocar un rocódromo, ademais de engadir un novo pavimento de caucho continuo de 300 metros cadrados, rodeado de herba artificial. No parque instalarase unha liña de pluviais para evitar as pozas e os asolagamentos, de 75 metros de lonxitude. Tamén se colocarán 3 pozos de rexistro e 4 arquetas.
A empresa que acadou unha mellor clasificación despois das 16 propostas presentadas, é SunneGalicia S. L. U, cunha oferta que corresponde a un presuposto de 27.805 euros.
