O Concello de Boiro porá a punto as instalacións deportivas da Cachada

O Concello de Boiro comeza as obras de reparación nas instalacións deportivas da Cachada. A idea é eliminar os problemas de filtración de auga e mellorar a iluminación e a imaxe do centro. O proxecto está financiado pola Deputación Provincial da Coruña e ten un custo total de 84.710,02 euros.

A reparación farase cando a situación meteorolóxica sexa favorábel. En total, uns 840 metros cadrados de superficie serán remodelados. O máis importante, segundo fixo saber o Cocnello, é renovar o paso que comunica o vestíbulo coa piscina, o ximnasio e o polideportivo, xa que actualmente presenta graves deficiencias. Ademais, levarase a cabo a colocación de falsos teitos e láminas de aluminio resistentes á corrosión. Cando todo isto se encontre listo, o último paso será substituír as luces existentes por LEDs de baixo consumo.