O Concello de Boiro celebra este xoves día 19 de novembro o pleno ordinario correspondente ao mes de novembro. A sesión vaise celebrar na Casa Consistorial ás 20.00 horas e, como de costume, retransmitirase en streaming a través da canle do Concello na rede social Youtube, onde tamén se poden visualizar as sesións plenarias previas.
O Goberno local confirmou novamente que co obxecto de cumprir as normas de seguridade pautadas pola Administración autonómica para a prevención da COVID-19 e cumprir coa capacidade da sala, non se vai permitir a entrada de público.
A orde do día inclúe, entre outros moitos puntos a tratar, o convenio de colaboración entre o Concello de Boiro e o Concello de Ribeira para a recollida de animais abandonados e outras cuestións que redunden en protección e defensa dos animais de compañía; unha moción presentada polas plataformas comarcais de emigrantes retornados de Arousa norte e de Muros-Noia sobre a tributación das pensións dos emigrantes retornados; unha moción de IC Boiro sobre o estado das ruínas das instalacións da empresa Boiromar no Chazo; unha moción de IC Boiro relativa á reclamación da débeda de Repsol pola ocupación de terreos de cos depósitos de gas no parque empresarial; unha moción do PP para instar ao Goberno a que ingrese as contías do IVE non liquidadas de 2017 como consecuencia da implantación do Subministro Inmediato de Información (SII); ou unha moción de Boiro Novo/ Mixto para a constitución de dunha mesa local de coordinación interinstitucional fronte á violencia machista.
