O Bloque Nacionalista de Galicia de Ribeira denunciou un grave problema de accesibilidade e seguridade na parroquia de Castiñeiras, onde foron colocados uns postes, á altura dos Mosqueiros (na recta da Fonte Seca), que impiden o libre tránsito dos peóns polas beirarrúas, obrigándoos a baixar ao firme por onde circulan os vehículos, co risco que isto implica. Veciños da parroquia ribeirense de Castiñeiras puxéronse en contacto co BNG para denunciar as obras de substitución dos postes.
O voceiro do BNG, Xosé Antonio Vázquez Cobas, cualificou esta actuación de “chafallada” e criticou o que cualificou de “pasividade e a inacción de Partido Popular ante unha actuación que suporá crear un obstáculo insalvábel”, obrigando ás persoas “a camiñar por unha estrada poñendo a vida en risco e impedindo o tránsito das persoas con mobilidade reducida e dificultado a circulación de vehículos”. E engadiu: “É abraiante ver a absoluta falta de control dos traballos por parte do Concello e a impunidade coa que operan certas empresas no espazo público”, dixo.
O BNG vai demandar que o Goberno local dea explicación ante “a colocación de postes que ocupan a beirarrúa impedindo o tránsito” e “os motivos que levaron a que ninguén controlara e supervisara os traballos”. Amais, demandará a posta en marcha de medidas que garantan a accesibilidade universal en todo o municipio, tamén nas parroquias.
