O Noia FS debutará fronte ó Parrulo Ferrol nos dezaseisavos da vixente Copa de España. O cadro noiés loitará por facerse un oco na seguinte fase a costa dos ferroláns, que militan na Primeira División, e que contan nas súas filas con xogadores de nivel mundial como o ferrolán Adri, ex do Pozo Murcia, entre outros.
O encontro non será novo para ningún dos dous conxuntos, xa que existen multitude de antecedentes na mesma competición. Ata en cinco ocasións, con esta seis, se miraron cara a cara os dous equipos galegos no torneo do KO. O Parrulo Ferrol conseguiu saír vitorioso dos anteriores duelos nos dezaseisavos da Copa do Rei fronte ó Noia FS. Pola súa contra, o cadro de Marlon Velasco aférrase ó momento doce que atravesa e ó triunfo conseguido nun amigable en setembro por 1-3 contra ó Parrulo.
A eliminatoria será disputada a partido único e terá lugar no Augustín Mourís, que acollerá a un total de 60 afeccionados que tratarán de axudar ó Noia Portus Apostoli a colarse por terceira vez na súa historia nos oitavos de final da Copa do Rei.
