O Concello de Ribeira informou do inicio das obras de acondicionamento da canle na desembocadura do río Listres, que delimita a separación das parroquias de Aguiño e Castiñeiras, así como o cambio de emprazamento da pasarela de madeira situada na contorna.
O Concello lembra que os traballos responden á solicitude feita no seu día á Demarcación de Costas do Estado para que autorizase a retirada da cerca de madeira da dita canle, de tal xeito que o caudal do Listres desembocase no mar polo seu curso natural: unha autorización que foi concedida polo ente estatal, indicando ademais a necesidade de desprazar a pasarela e a ponte de madeira augas arriba.
A tal efecto, os servizos técnicos municipais redactaron o pertinente proxecto, que inclúe a desmontaxe da cerca de madeira e o acondicionamento da canle, así como a construción dunha nova pasarela de 131 metros xunto cun paso peonil de 12 metros e o traslado das luminarias da vella a nova estrutura.
A obra están sendo executada por Tarrío y Suarez, S.L. O seu orzamento ascende a 36.465 euros e o prazo de execución é dun mes e medio.