A colocación da iluminación de Nadal por parte do Concello noiés non está a ser ben vista dende a sede da Marea Cidadá. O partido local manifestou que “non rexeita”, pero si critica a antelación coa que se instalaron os adobíos. Dende a Marea aseguran que “a súa colocación a comezos de novembro é algo excesivo”, tendo en conta a situación actual por mor da pandemia.
A principal causa pola que a Marea Cidadá de Noia rexeita o plan do Concello é “o escaso rendemento que tería para a economía e comercios da zona”, xa que afirman que “moitos negocios da vila non poderán abrir ou quedarán fechados a causa da COVID-19”. Dada a situación actual dos negocios locais, e a falta de recursos para a súa supervivencia, dende a Marea rexeitan a iluminación do Nadal como “solución para os comercios” e reclaman “pór en funcionamento sistemas de axudas públicas, bonos para o comercio local, ou promover a compra en liña nos negocios da zona”.
Por último, a Marea Cidadá considera que “os elementos decorativos instalados son excesivos” e insta “á compra do material de iluminación de Nadal en vez de telo alugado”.
