A Asociación de Gaiteiras Galegas organiza este domingo 22 de novembro o encontro Tradición en feminino, no Pazo de Rianxiño. Será, en palabras do dito colectivo, “unha xornada lúdica onde compartir experiencias conversando con Maruxa dos Rosales, aprender como se fai unha recolla a través dun obradoiro práctico con Xulia Feixoo e afondar na tradición dende unha perspectiva de xénero da man de Mercedes Peón”. O programa de actividades arrincará ás 10.45, coa sesión oficial de apertura, e incluirá, entre outras cousas, un coloquio no que intervirán Xulia Feixoo, Mercedes Peón, Noemi Basanta Llanes e Marina Vigo.
Con este encontro, levado a cabo ao abeiro das axudas para actividades culturais da Cultura da Deputación da Coruña e coa participación do Concello de Rianxo, a asociación quere reivindicar “o enorme e imprescindíbel papel que tivo e ten a muller para a preservación e transmisión da nosa riqueza cultural”.
Por motivos de seguridade, o aforamento será limitado e será precisa a inscrición previa a través dos teléfonos 986 84 70 74 – 982 22 99 66. Quen desexe máis información, pode obtela tamén a través da web da AGG.
