A entidade SEA, Solo Empresarial do Atlántico, contratou a limpeza e roza do Parque Empresarial de Muros por 4.261 euros. Os traballos, contratados á sociedade Leboreiro SL, iniciaranse nos vindeiros días, abranguendo tarefas de acondicionamento nas parcelas que non están vendidas no devandito complexo empresarial muradán, que conta cunha superficie bruta de 196.207 m2 e neta de 92.124 m2.
A empresa finalmente elixida terá que desprazar a maquinaria precisa para a roza e limpeza das parcelas que non están ocupadas e encargarse da xestión da biomasa vexetal que se xera nestas tarefas.
En palabras de SEA, a contratación supón un novo paso da entidade en materia de xestión proactiva, co obxectivo de manter en bo estado os seus parques empresariais, tanto para facilitar a actividade das empresas xa instaladas como para propiciar a mellora da imaxe das parcelas industriais. Solo Empresarial do Atlántico pechou contratos análogos, recentemente, nos parques de Vilanova, A Laracha, Malpica, Vimianzo e Mondoñedo, por valor de 20.000 euros.
