A xunta de goberno local deu luz verde na súa sesión de hoxe á adhesión do Concello de Ribeira ao PEL Reactiva da Deputación Provincial da Coruña cunha aportación municipal de 224.913 euros: unha cantidade
sensiblemente superior á esixida para poder beneficiarse deste fondo
de financiamento para a reactivación económica e social da provincia,
dado que o mínimo de 92.653,78 euros requiridos (é dicir, un 20%
das achegas) viuse suplementado noutros 132.259,80 euros. A
institución provincial, pola súa parte, aporta 370.615,10 euros ata
sumar un total de 595.528,68 euros.
Xa nunha reunión celebrada a finais da pasada semana coa Asociación de Empresarios de Ribeira avanzouse por parte do alcalde Manuel Ruiz a intención de concorrer cunha contía moi importante a estes fondos, cuxos beneficiarios son os autónomos e microempresas dos concellos menores de 50.000 habitantes. No municipio ribeirense son 1.907 os potenciais beneficiarios dos case 600.000 euros da achega, dos cales 1.640 teñen entre 0 e 2 asalariados; 191, de 3 a 5; e 76, de 6 a 9.
Redución da pegada de carbono
Por outra parte, e tal e como adiantou tamén o alcalde na devandita
reunión co colectivo empresarial (igualmente foi transmitido aos
voceiros dos grupos), o Concello pretende dedicar fondos do Plan
Reactiva Ribeira a incentivar o fomento de modelos de transporte
urbano alternativos ao vehículo a motor particular, reducindo deste
xeito a pegada de carbono.
Dúas son as liñas nas que se está a traballar dende o Executivo:
Por unha banda, subvencionar a adquisición de motocicletas e
bicicletas eléctricas e bicicletas convencionais por parte da cidadanía, especialmente para achegarse a certos destinos como poden ser o polígono industrial de Xarás —o que serviría ademais para desconxestionar o tráfico deste centro de operacións— ou os institutos e o Centro Integrado de
Formación Profesional de Coroso (cómpre lembrar a este respecto que acaban de comezar as obras nas Carolinas que completarán a habilitación de carril bici por toda a fachada marítima da cidade).
Por outra, bonificar o transporte municipal en autobús coa pretensión de que sexa absolutamente gratuíto para toda a veciñanza empadroada en Ribeira. No caso de que non fose financeiramente posible, aspírase cando menos á gratuidade do bus para determinados colectivos como persoas xubiladas e menores de idade.
Ordenadores para escolares
Por último, cómpre informar de que tras a pertinente publicación do
anuncio no BOP de onte, hoxe xoves abriu o prazo para presentar
solicitudes ao programa Innova-Formación, que forma parte do Plan Reactiva Ribeira e está destinado a subvencionar a adquisición de equipos informáticos por familias con alumnado en centros docentes públicos e concertados do municipio.
Destínanse un total de 60.000 euros con dúas liñas de achegas, unha xenérica en función duns baremos e outra específica para afectados polo covid-19. Os equipos (ordenadores de sobremesa e portátiles) deberán adquirirse en establecementos do comercio local que tamén deberán adherirse ao programa.
Tanto no caso das familias beneficiarias como dos establecementos colaboradores, o prazo para formular as súas solicitudes é de 15 días hábiles (ata o 22 de outubro). Máis información na páxina web www.ribeira.gal.
