O Grupo Municipal Socialista de Noia anunciou que no vindeiro pleno ordinario do mes de outubro solicitará ao equipo de Goberno que se realice un informe do estado dos pasos de peóns “coa finalidade de mellorar a seguridade viaria na vila”. Segundo lembra PSdG-PSOE, na moción pedirase un informe por parte da Policía Municipal para identificar os pasos de peóns situados no núcleo da vila coas seguintes características: os que teñan visibilidade reducida, os que estean situados en lugares onde os vehículos circulen con velocidade demasiado elevada, nos que sería conveniente que os vehículos circulasen a 30 quilómetros por hora con preferencia peonil, os que non estean pitados correctamente e os que teñan iluminación deficiente.
Os socialistas consideran que “os accidentes no núcleo urbano de Noia por sorte non son habituais, pero iso non debe ser un freo para tratar de mellorar a seguridade viaria e facer todo o posíbel para que o casco histórico e a súa contorna sexa un lugar seguro para dar un paseo pola vila, sen que haxa risco de accidentes”.
O voceiro da agrupación Roberto Iglesias indica que “actualmente hai varios pasos de peóns no que a visibilidade é reducida, porque hai estacionados vehículos moi próximos e a persoa non é visíbel ata que comeza a cruzar, como na rúa Pontevedra, e outros que precisan dun pintado para mellorar a súa visibilidade, e algúns nos que, sobre todo agora en outono e inverno, con menos luz natural e condicións climáticas adversas, habería que iluminar artificialmente dunha maneira máis axeitada”.
A moción tamén contempla que unha vez se faga o informe da Policía Local, se leven a cabo as accións pertinentes para solucionar as deficiencias atopadas, tanto pola Administración local, como solicitar á Deputación ou á Xunta de Galicia as que sexan da súa competencia.
