O escritor santiagués Emilio Vázquez Fernández vai presentar este venres 23 en Ribeira o seu libro 50 años de mentiras. A cita será no Centro Cultural Lustres Rivas, a partir das 20.00 horas, e contarase coa presenza de María Sampedro Fernández, primeira tenente de alcalde e concelleira de Cultura e de Alicia Padín Otero, técnica do Servizo de Normalización Lingüística do Concello, ademais do propio autor.
Publicado polo selo madrileño Letrame Grupo Editorial, o libro 50 años de mentiras reúne ao longo de 96 páxinas poesías, pequenos relatos e reflexións en torno ao profundo da natureza humana.
Emilio Vázquez Fernández naceu en Santiago de Compostela en 1969 e reside en Boiro. De mozo cursou estudos de Náutica e dende 2005 desempeña labores de funcionario como axente do Servizo de Vixilancia Aduaneira. 50 años de mentiras é o seu primeiro libro.
