O Bloque Nacionalista Galego de Noia presentou unha iniciativa para ser tratada en debate acerca de Ponte Nafonso e os problemas de inseguridade que causa o tráfico no lugar. O BNG, que someterá a cuestión a debate na vindeira sesión plenaria, sostén que o devandito núcleo é unha contorna “que carrexa importantes eivas de seguridade viaria que non foron superadas nas últimas décadas”.
O grupo, que lembra que en 2017 achegou unha petición para reducir eficazmente a velocidade en Ponte Nafonso, considera que nada do solicitado daquela se levou finalmente a cabo, e mesmo se chegou a empeorar a situación da seguridade ampliando o firme polo que transcorre o tráfico rodado.
Segundo indican os nacionalistas, as solucións propostas son a instalación de beirarrúas amplas en ambas marxes da estrada ao longo da zona habitada e o establecemento de pasos de peóns na contorna do parque infantil e da parada de autobuses.
Denuncian tamén que o lugar da sinal de redución da velocidade “atópase nun punto posterior ao parque infantil e unha vez xa ten comezado o núcleo urbanizado”, polo que piden “o seu desprazamento para que afecte a toda a zona habitada”.
Os nacionalistas lembran que as actuacións deben ser “facilmente complementarias coas que se teñan que levar cabo de xeito posterior para a posta en marcha do futuro Plan Especial de Protección, Ordenación e Infraestrutura e Dotación, incluído no PXOM que se encontra en vías de ser aprobado”.
Ademais, apuntan que a mellora da Ponte como elemento patrimonial de especial importancia “non debe desviar a atención de outros elementos” que, no punto de vista do BNG, “requiren de atención”, como son posta en seguridade e restauración do Cruceiro da Ponte Nafonso e a eliminación da simboloxía falanxista na fonte do lugar.
