O Bloque Nacionalista Galego vén de levar ao Parlamento de Galicia a mellora da seguridade viaria AC-550 ao seu paso por Noia. Segundo informa o grupo nacionalista, a estrada soporta cada día un elevado fluxo de tráfico, unha tónica que se repite todas as xornadas do ano pero que se agrava nos meses de verán por mor das persoas que visitan o concello de Noia e das que usan o viario para visitar outras vilas próximas, como Portosín ou Porto do Son. O BNG sostén que “no caso da parroquia de Boa, ao sur do municipio de Noia, os veciños e veciñas levan máis de 25 anos denunciando a inseguridade viaria e a falla de pasos de peóns que non existen ao longo de toda a parroquia e que lles impide cruzar a estrada de xeito seguro”.
No caso dos lugares de Orro, Vilanova e Eiroa, no outro extremo do concello de Noia, “o problema é moi similar”, engaden os nacionalistas, que recordan que a inseguridade é aínda maior pola presenza de nenos e nenas que teñen que cruzar a estrada para ir aos seus centros de ensino.
Para os nacionalistas, “a estrada supón a quebra en dúas partes dos núcleos de poboación citados” e “opinan que as solucións deben ser inmediatas, ben sexa a través do pintado de pasos de peóns ou ben sexa en forma de pasos voados”. Piden, ademais, unha redución efectiva da velocidade de tránsito rodado polos núcleos nomeados e a sinalización axeitada dos pasos de peóns que existen en outras zonas do paso da estrada polo municipio.
