O Auditorio de Rianxo vai acoller no mes de novembro unha mostra de pinturas do artista Francisco Pérez Alonso directamente encamiñada a reivindicar o traballo das mariscadoras. A exposición poderá visitarse entre este 30 de outubro, día programado para a inauguración, e o 28 de novembro. A mostra comeza a súa andaina en Rianxo este venres a partir das 20.00 horas.
Como dixemos, a exposición é un tributo ás traballadoras do mar, concretamente as da contorna de Vilanova. Tivo a súa orixe nas propias mariscadoras do concello arousán, que foron elas mesmas as que lle propuxeron ao artista plasmar o seu traballo nos bancos de marisco nunha serie pequena de cadros. O artista colleu a testemuña e decidiu ampliar o número de pinturas até a vintena, abordando o proxecto con fotografías das mariscadoras a xeito de materia prima e, sobre todo, baixando á praia para inmortalizar o seu día a día nos bancos produtivos. A mostra é unha exposición itinerante que está a percorrer diversos concellos da nosa contorna dende a súa estrea en Vilanova, en agosto do ano pasado.
