O Concello de Noia vén de presentar a súa axenda cultural para estes meses de outono, un completo programa de actividades seguras e con aforamento limitado pero cunha vertente marcadamente diversa e creativa que pon de manifesto o interese do Goberno local de cubrir o meirande rango de idades, gustos e tendencias. A axenda de outubro comeza este sábado ás 11.30 horas cunha actividade de robótica para a rapazada, o obradoiro Átomos na Biblioteca Municipal, para nenas e nenos de entre 8 e 12 anos.
As actividades proseguirán o sábado 10 co espectáculo de ilusionismo Vitamina CC: Carvalho Calero, a cargo de Martín Camiña. Será na Casa da Cultura ás 12.00 horas (para maiores de 5 anos). O xoves 14 é a quenda do Elefante Elegante, que representará o contacontos O Lobo Bobo, a partir das 18.30 horas na Casa da Cultura (para nenos de entre 3 e 8 anos).
O domingo 18 será un día de cinema coa proxección de Juliet Desnuda, ás 18.30 horas na Casa da Cultura (para maiores de 18 anos).
O sábado 24 a cultura urbana toma a palabra cunha homenaxe rapeira á poesía galega a cargo de García MC, ás 12.00 horas na Casa da Cultura (para maiores de 13 anos).
O outubro cultural en Noia rematará coa XXI Mostra de Curtas de Noia, a desenvolver entre o xoves 22 e o sábado 31. 🎭🎥📚
Tódalas actividades teñen aforo limitado, polo tanto haberá que formalizar a inscrición antes de asistir a cada unha delas.