O Concello de Rianxo informou do comezo das sesións formativas do Obradoiro de Emprego e Garantía Xuvenil Carnero Valenzuela II, que se desenvolven no Auditorio coa presenza de 16 menores de 30 anos. A iniciativa, financiada pola Consellería de Economía, Empresa e Innovación da Xunta, centra os seus recursos en capacitar á mocidade local na especialidade de Confección e publicación de páxinas web. O contrato dos participantes terá unha duración de 12 meses e, ao longo deste tempo, combinarán o traballo de formación coa práctica laboral.
O obradoiro é unha iniciativa destinada a ampliar a formación da xente nova e dotar ás mozas e mozos de instrumentos, recursos e coñecemento que lles permitan abrir a meirande cantidade de portas no mercado laboral. Desta volta trátase de converter a 16 alumnas/os e traballadoras/es en especialistas na creación e mantemento de sitios online, un ámbito profesional cada vez máis demandado por empresas e entidades, tanto para ampliar os seus equipos como en materia de servizos requiridos.
O programa de emprego Carnero Valenzuela II é un programa mixto de emprego e formación dirixido a mellorar a inserción das persoas desempregadas mozas incluídas no Ficheiro do Sistema Nacional de Garantía Xuvenil, co-financiado pola Iniciativa de Emprego Xuvenil e o Fondo Social Europeo, e promovido polo Concello de Rianxo.
