Novamente a nosa terra rende tributo ao rianxeiro Alfonso Daniel Rodríguez Castelao e aos seus ilustres coetáneos. Foi este mércores 21 de outubro, na reunión do xurado dos Premios Otero Pedrayo 2020, que decidiu galardoar este ano ás fundacións Losada Diéguez, Vicente Risco, Castelao e Otero Pedrayo pola súa contribución á difusión do legado dos principais persoeiros da Xeración Nós. Na xuntanza do xurado participaron de xeito telemático o secretario xeral de Cultura, Anxo M. Lorenzo, e o secretario xeral de Política Lingüística, Valentín García. Ademais, fixéronse dúas mencións, unha ao Museo Arqueolóxico Provincial de Ourense (centro museístico do Estado e de xestión autonómica), e outra ao Concello de Cambados.
A entrega do Premio Otero Pedrayo será o 30 de outubro en Ourense, se “a situación sanitaria o permite”, explicaron os impulsores do galardón, lembrando que este vén da man da Xunta de Galicia e as catro deputacións provinciais, co punto de partida en 1977, converténdose logo no premio cultural máis lonxevo de Galicia. Ten como obxectivo “perpetuar e honrar a memoria de Otero Pedrayo, recoñecer o labor de contribución eminente á cultura e promover os valores propios da nosa terra e as obras que leven ao esclarecemento e á mellora da súa cidadanía e institucións”.
Recordar que este recoñecemento ás catro fundacións coincide co centenario da publicación da Revista Nós, que se está a conmemorar cun completo feixe de actividades, como a exposición Galicia, de Nós a nós que pode verse na Cidade da Cultura de Galicia.
