ANFACO-CECOPESCA homenaxea a tres traballadoras de Calvo e JEALSA

09 Outubro 2020

Este venres a confederación de empresas pesqueiras e conserveiras ANFACO-CECOPESCA entregou as súas Medallas do Ano edición 2020 na sede do Círculo de Empresarios de Galicia. O evento, que se celebrou tras ser aprazado no mes de maio pola crise sanitaria, xuntou autoridades e referenciais representantes industriais do sector extractivo e conxelador pesqueiro, conserveiro e transformador de produtos do mar e a súa industria auxiliar. O ex presidente da entidade, Jesús Alonso, foi o encargado de inaugurar o acto.

Coa distinción das medallas de ouro e prata, ANFACO-CECOPESCA enxalza o apoio e colaboración que os galardoados veñen prestando tradicionalmente á industria de transformación e comercialización de peixes e mariscos española, mentres que coa distinción da medalla de bronce, ANFACO-CECOPESCA distingue a categoría persoal e profesional de traballadores do sector, neste caso concreto tres traballadoras das conserveiras Calvo e JEALSA.

Neste ano 2020 as galardoadas foron as seguintes:

Medalla de Ouro

Concedida á Axencia Galega de Innovación (GAIN), recolleu a Medalla o vicepresidente segundo da Xunta de Galicia e conselleiro de Economía, Francisco Conde López. Con esta condecoración ANFACO-CECOPESCA quere destacar o papel da axencia como “axente clave no desenvolvemento empresarial galego ligado á innovación, liderando liñas estratéxicas relacionadas coa Industria 4.0, a Economía Circular ou Biotecnoloxía Azul, que permitiron ás industrias seguir competindo con produtos, procesos e modelos de negocio diferenciadores”.

Medallas de Prata

Concedida a Clara Eugenia Aguilera García, eurodeputada e membro da Comisión de Pesca do Parlamento Europeo, en recoñecemento “ao apoio e colaboración que vén prestando á industria de transformación e comercialización de conservas de peixes e mariscos española, representada por ANFACO-CECOPESCA como organización empresarial”, recoñecendo especialmente con esta Medalla “o fomento da competitividade do sector e a defensa dos seus intereses”.

Medallas de Bronce

Concedidas a Josefa Costa Nieto, traballadora na empresa Calvo Conservas desde o ano 1971; Visitación Cancela Rodríguez, traballadora na empresa Calvo Conservas desde o ano 1972; e Ángeles Santos Tubío, traballadora na empresa JEALSA desde o ano 1974.

Ao acto asistiron Alberto Núñez Feijóo, presidente da Xunta de Galicia; Miguel Ángel Santalices Vieira, presidente do Parlamento de Galicia; Ana Pastor Julián, vicepresidenta segunda do Congreso dos Deputados; Francisco Conde López, vicepresidente segundo da Xunta de Galicia e conselleiro de Economía, Empresa e Innovación; e Rosa Quintana Carballo, conselleira do Mar, entre outros representantes do ámbito político.

Outros artigos

Publicidade

Revista en papel

Opinión

“Cando existen intereses contrapostos na pesca”. Antón Luaces

“Cando existen intereses contrapostos na pesca”. Antón Luaces

Dicirmos que hai diverxencia entre o sector pesqueiro e os gobernos (autonómico e/ou central) non é descubrir, arestora, o Atlántico. Resulta tan evidente ese desencontro, que só a desunión permanente no eido da pesca marítima explica que o sector, en Galicia e as...