A Mostra de Teatro de Ribeira cambia aforos e horarios e convértese en gratuíta

A Concellería de Cultura de Ribeira vén de facer unha serie de modificacións na programación da Mostra de Teatro, por mor do empeoramento da crise sanitaria e das novas restricións, e co obxectivo último de garantir a seguridade dos asistentes aos diferentes espectáculos. Segundo fixo saber o Concello, procedeuse a cambiar os aforos e os horarios das sesións e, tamén, á anulación e devolución do importe proporcional dos bonos para o citado ciclo teatral

Así, por cada bono serán devoltos 20 €, xa que do seu prezo total de 25 € descóntanse 5 € polas dúas funcións celebradas con normalidade os días 9 e 16 de outubro. A devolución poderá solicitarse a partir do luns 2 de novembro e ata rematar o mes, tendo que facelo expresamente para ter dereito á mesma no Centro Cultural. Lustres Rivas de Ribeira ou ben a través da conta de correo culturaefestexos@ribeira.gal. O Concello lembra que será preciso aportar un certificado orixinal do IBAN da conta bancaria onde se queira recibir o abono, o xustificante do pago do prezo público da adquisición do bono que se entregou no momento da compra e o DNI do interesado que adquiriu o/os bono/os coa súa tarxeta bancaria na OAC. Unha ver rematado o prazo de solicitudes o 30/11/2020 procederase á devolución dos importes correspondentes antes de finalizar o ano 2020.

Malia isto, ao abeiro do apoio do Concello á cultura e aos seus traballadores, o Concello non renuncia á celebración da Mostra de Teatro. Por tal motivo, decidiuse seguir con esta programación, pero de forma gratuíta e adaptando o seu horario á normativa en vigor. Así, os espectáculos dos venres adiantan a unha hora o seu comezo, concretamente ata as 20.30 horas abrindo portas do auditorio para o seu acceso a partir das 20.00 horas (medida que non afecta ás dúas funcións adiadas aos días 15 de novembro e 6 de decembro ás 19 horas tal e como se informou a semana pasada).

Inscrición previa a partir do luns

Ademais, o aforo estará limitado a 60 persoas, sempre separados por convivintes, segundo á normativa vixente. As persoas interesadas en asistir deben inscribirse no correo electrónico culturaefestexos@ribeira.gal facilitando nome e apelidos, lugar de residencia, teléfono e relación de convivintes, podendo facer as reservas de luns a venres ás 13 horas para o espectáculo de cada semana, tendo que agardar a confirmación por parte de Cultura onde se indicarán o número das butacas asignadas.

O Concello lembra que estes aforos poderán ir aumentado ou diminuíndo segundo o que indiquen as autoridades sanitarias en cada momento e a evolución da pandemia no conxunto do Estado, Galicia ou no municipio de Ribeira.

Por todo o exposto, o calendario da mostra, que seguirá a celebrarse ata o 12 de decembro, quedará do seguinte xeito:

· O mozo da última fila

Redrum Producións

6 de novembro: Hora 20:30

· Os nenos da variola

Pérez & Fernández

13 de novembro: Hora 20:30

· A primeira vez

Talía Teatro

Domingo 15 de novembro:

Hora 19:00

· Concerto Con-Fusión

Píscore

20 de novembro: Hora 20:30

· Sereas, dragóns e pistas de baile

Avelino González

27 de novembro: Hora 20:30

· O mel non caduca

Ibuprofeno Teatro

4 de decembro: Hora 20:30

· SÓS

Malasombra

Domingo 6 de decembro:

Hora 19:00

· O Rei Telesforo busca noiva (e quere noivo)

Grupo Municipal de Teatro de Ribeira

Sábado: 12 de decembro:

Hora 20:30