A Marea Cidadá de Noia vén de emitir un crítico comunicado acerca das obras da depuradora de Ponte Nafonso, das que solicita a súa inmediata paralización por estar emprazada nun lugar, sostén, que non resultaría acaído para unhas instalacións destas características. O grupo tamén reflicte no comunicado o que cualifica de malestar da veciñanza e dos grupos da Corporación municipal “pola falta de información por parte do Goberno local”, sinala a A Marea Cidadá, engadindo que Noia “leva anos afrontando un serio problema de depuración das augas”, un problema que ao se xuízo non pode ser arranxado co emprazamento finalmente elixido, en primeiro lugar “pola preocupación que está a xerar entre as veciñas e veciños de Ponte Nafonso”.
A Marea tamén comunica que preguntará ao alcalde polos motivos que impulsaron a modificación do emprazamento orixinal da depuradora, así como polo feito de que “non se valorasen outras opcións menos problemáticas”.
Por último, e a petición dos veciños de Ponte Nafonso, a Marea de Noia preguntará ao rexedor pola posíbel solución ao saneamento que verte na ponte, “tanto neste lugar onde se atopa a obra da depuradora como no caso do vertido da ponte antiga”. Dende a Marea Cidadá sinalan que buscarán o apoio do resto de grupos municipais para levar a cabo esta paralización.
