O acto en conmemoración do 700 aniversario da Muralla de Noia,
organizado polo BNG na xornada do venres no Edificio Casino de Noia,
xerou un grande interese entre a veciñanza, que ateigou as limitadas
prazas postas a disposición pola formación nacionalista.
A primeira intervención foi a cargo das arqueólogas Manuela Pérez e Lola
Gil, autoras do estudo arqueo-histórico incluído no Plan Especial de
Protección e Reforma do Casco Histórico de Noia, as cales se centraron na
evolución dos sistemas defensivos ao longo da historia da vila noiesa.
A continuación, Ana Isabel Filgueiras, arqueóloga da Oficina de
Rehabilitación do Casco Histórico noiés, falou sobre a significación simbólica da muralla e a súa influencia na trama urbanística actual.
Pola súa parte, a deputada do BNG no parlamento galego, Rosana Pérez,
reafirmou o compromiso do BNG coa protección do patrimonio e defendeu
o papel central que esta cuestión debería significar para a administración e
a sociedade en xeral.
O acto foi pechado polo portavoz da agrupación do BNG en Noia, que
aproveitou para facer un pequeno agasallo ás poñentes en agradecemento
“por poñer o seu tempo e sabedoría a disposición da veciñanza de Noia”.
Ademais, Ricardo Suárez, lamentou “que o acto, cunha importante carga
simbólica para o municipio, non puidera acoller a todas as persoas que se
interesaron por acudir”.
O acto tamén foi retransmitido en directo a través da canle de ‘Facebook’
do BNG Noia na plataforma ‘YouTube’ e poderase ver baixo o título de ‘700 aniversario da Muralla Medieval de Noia’.
O cardiólogo noiés José Ramón González Juanatey opta a presidir a Federación Mundial do Corazón cun proxecto contra a fenda sanitaria
Segundo informa Mundiario, o catedrático da USC disputa o liderado da entidade global fronte ao especialista chinés Junbo Ge no congreso de Río de Xaneiro. O prestixioso cardiólogo galego e catedrático da Universidade de Santiago de Compostela (USC), José Ramón...
