A agrupación SumaRibeira emitiu un novo comunicado sobre o proxecto de Auditorio Municipal que impulsa o Concello e que, en palabras da dita plataforma cidadá, segue a ser obxecto de “continuados incrementos de presuposto” malia que o crédito inicial dispoñíbel forse de 2,1 millóns de euros, unha cifra que se foi incrementado no tempo dende o oito do outubro de 2019, “cando a empresa gañadora do concurso presenta un breve escrito no que alega carencias que tería o Auditorio de axustarse ao orzamento de 2.500.000, ao que si se axustaron máis de trinta empresas que se presentaron á primeira fase co concurso”.
SumaRibeira tamén lembra como máis tarde a mesma firma solicitou a aceptación dun presuposto de execución por contrata de 4.002.922€, é dicir, “un incremento dun 60%”, unha petición que o grupo cidadá denuncia que non xerou debate previo sobre a procedencia de aceptar estas demandas, e que motivou que fose levada a pleno a aprobación dun crédito extraordinario de 1.499.000 para acadar un orzamento de 3.599.000 para a realización dun Auditorio con toda a dotación “suficiente e necesaria” para Ribeira.
“Para maior contrariedade e sorpresa”, engade SumaRibeira, “sae a licitación a obra por 3.599.000€ e só se presenta unha empresa, que solicita certos cambios puntuais nas calidades dos materiais alegando escaseza no orzamento”. Estas peticións, explica a agrupación, derivan no feito de que a empresa de arquitectura gañadora do concurso comunique ao Concello que o novo presuposto ten que subir de 3.599.000€ a 4.739.000€.
En vista destas cifras, SumaRibeira informa o seguinte no seu comunicado: “Lamentamos moito vernos na necesidade de dicir que nos parece unha obscenidade política que se queira relativizar a importancia de incrementar un orzamento de fondos públicos dende 2.500.000 a 4.739.000 (un aumento aproximado do 90%), e se a isto lle engadimos o delicadísimo contexto económico municipal, autonómico, español, europeo e mundial provocado pola pandemia, para SumaRibeira este incremento non é admisíbel”.
