Até setenta nenas e nenos do concello de Rianxo remataron este último venres de agosto as actividades do Campamento dde Verán. O programa de case dous meses de duración contou co apoio do Ministerio de Igualdade e desenvolveuse en tres espazos diferentes, unha medida (a de descentralizar as actividades) que foi posta en marcha como medida de distanciamento para garantir a seguridade sanitaria da rapazada. Concretamente, o campamento levouse a cabo no Colexio Ana María Diéguez de Asados, o CEP Brea Segade de Taragoña e o Pazo de Rianxiño con grupos reducidos baixo a supervisión dun monitor/a.
Segundo salientou o Concello, as medidas de seguridade e hixiene estiveron presentes nas actividades en todo intre, conseguíndose que o programa “rematara sen ningún episodio de contaxio entre os participantes e fose posíbel desenvolver a programación sen máis sobresaltos”. Funcionou tamén un programa Madruga para ampliar a xornada e colaborar na conciliación familiar. O Goberno local quixo destacar a bo facer dos monitores e monitoras que “nun contexto complexo sostiveron a actividade de dinamización das crianzas rianxeiras con actividades para grupos reducidos”.
A xeito de clausura das actividades, o venres celebráronse varios espectáculos de animación circense nos tres espazos sinalados: Lila Superstar, Nomo e Autopista Intergaláctico. Nos días previos houbo diferentes obradoiros como o de Bo Trato, da Secretaria Xeral de Igualdade da Xunta de Galicia.
