Os vigueses José Luís Álvarez e Oswaldo Davila séguenlles a tan só dous puntos na clasificación xeral Venres, 11 de setembro de 2020.- A falta de dúas últimas xornadas para a consecución do Campionato Galego Inclusivo de Motonáutica, os noieses José Barrio e Pilar Sarmiento lideran a clasificación xeral da categoría autonómica, pendentes do que fagan os seus adversarios no podio provisional, os vigueses José Luís Álvarez e Oswaldo Davila, na segunda praza a tan só dous puntos, e os tudenses Estévez e Piñeiro, a catro do banzo dourado do podio.
Este próximo domingo 13 de setembro Outes acolle a cuarta proba, organizada pola Federación Galega de Motonáutica e ADECO- DEA – Agrupación Deportiva Costa Oeste / Deporte Adaptado, coa colaboración do propio concello coruñés. O Freixo será o marco no que se desenvolva a competición, con sete equipos en liza que, sumados ao noies, vigués e tudense, tamén aglutina deportistas de Tomiño e Sada.
Con arranque programado ás 11 horas da mañá, piloto e copiloto terán que enfrontarse a unha serie de probas de destreza, nun circuíto marcado por boias fondeadas sobre as que terán que trazar un percorrido con diversas dificultades, e que serán desveladas no último momento polo Comité de Xuíces da Federación Galega de Motonáutica..