Os traballos de recuperación e posta en valor do Pazo-Torre de Goiáns de Boiro, unha das grandes xoias arquitectónicas da arquitectura civil galega, avanzaron de xeito importante este verán, un ritmo de obra que conseguiu abreviar os prazos previstos na orixe do proxecto pola empresa adxudicataria. Segundo nos fixo saber o Concello, está previsto que as tarefas rematen a comezos do vindeiro verán.
Os avances no proxecto viñeron dados en boa medida pola urxencia para conservar e protexer tan relevante edificio, que tiña o tellado derrubado e cuxa estrutura estaba a verse seriamente afectada polas filtracións de auga. A previsión é que a cuberta fique colocada antes da tempada de choivas.
No mes de agosto, os traballos que se realizaron foron os seguintes:
• Rematouse a estabilización e encintado dos muros de pedra.
• Rematouse a aplicación de morteiros tradicionais de cal nos parámetros que van revestidos.
• Retiráronse as fiestras de madeira aproveitábeis para usar como modelo das novas xanelas.
• Rematouse a división e recebo da zona de aseos e cuarto de instalacións, para poder comezar os acabados finais.
• Recuperáronse ocos e armarios realizados en pedra que se atopaban tapiados debido a numerosas reformas do pazo.
• Preparáronse as cornixas e topetes de remate dos muros para recibir a cuberta de madeira.
• Comezouse coas tarefas de estabilización e limpeza da Torre de Goiáns.
• Está en fabricación a estrutura de madeira que vai formar o primeiro andar e a cuberta, que está previsto que se coloquen no mes de setembro.
• Estanse a realizar as canalizacións ocultas do sistema de climatización de aire interior.
• Estanse a seleccionar os materiais de acabado (tellas, terrazo, alicatados…) escollendo entre as opción de diversos provedores para determinar os materiais de acabado que mais se axusten ás características propias do pazo.
De maneira paralela a estas tarefas de recuperación do inmóbel, o Concello de Boiro está a traballar con medios propios nas construcións anexas, protexendo os muros para evitar o seu deterioro e esborallamento, e tamén acondicionando o entorno axardinado.
O Goberno local anunciou tamén que vai crear un comité que valorará os usos que darlle a construción e a súa contorna e a que funcións concretas destinalas, aínda que alén de calquera outra consideración o que está fóra de toda dúbida, en palabras do Concello, é que irá destinado á veciñanza. “Agardamos que para o vindeiro verán o pazo estea xa rehabilitado para o desfrute de todos os boirenses”, explicou o alcalde José Ramón Romero.
