O Concello de Rianxo implícase cunha nova xornada de limpeza fluvial ao abeiro do Proxecto Ríos

24 Setembro 2020

Esta fin de semana, Proxecto Ríos e a asociación ecoloxista ADEGA organizan a XIII Limpeza Simultánea Móllate polos ríos, que este ano celébrase en 49 concellos de toda Galiza, incluído o de Rianxo (grazas á colaboración do voluntariado e do Goberno local, que porán o foco, coma noutras ocasións, na limpeza de refugallos no río Te). Segundo informou ADEGA, está prevista a participación de 58 entidades (asociacións, comunidades de montes, colectivos ecoloxistas, delegacións de ADEGA, centros de ensino…) e tamén de 12 concellos que co-organizan directamente esta actividade.

A limpeza, que será este domingo, 27 de setembro, mobilizará unha chea de voluntarios e voluntarias que se desprazarán aos ríos destes 49 concellos para deixalos libres de lixo, nunha xeira de voluntariado ambiental e concienciación social.

A limpeza conta co apoio de Augas de Galicia e o IET, e dos seguintes concellos: A Estrada, Arzúa, Ames, Carballo, Fene, Gondomar, Meis, Melide, Nigrán, Ourense, Pol, Ponteareas, Pontevedra, Rianxo, Ribadumia, Salceda de Caselas, San Sadurniño, Santiago de Compostela, Teo, Tomiño, Verín e Xinzo de Limia.

Este ano moitas das limpezas forman parte das accións que se están a desenvolver en relación á Semana Global de Accións polo Clima do día 27 de setembro.

O Proxecto Ríos é un programa de Educación e Voluntariado Ambiental que ten “a finalidade de dar a coñecer o importante papel dos cursos fluviais, amosar as súas problemáticas así como fomentar iniciativas que permitan á cidadanía o mantemento e a mellora dos ríos proporcionando as ferramentas que garantan a súa participación”. Este proxecto é iniciativa de ADEGA e está promovido e financiado por Augas de Galicia, organismo que pertence á Consellería de Infraestruturas e Mobilidade.

Súmate á limpeza dos ríos de forma segura

ADEGA lembra tamén que para levar a cabo a actuación existe un protocolo de limpeza segura de ríos que se pode descargar en PDF na web do Proxecto Ríos. Tamén se agasallará aos/ás voluntarios/as con unhas máscaras co lema da limpeza tecidas en algodón orgánico, reutilizábeis e “feitas aquí en Galiza”.

Respectaranse tamén as indicacións pertinentes en relación á situación de pandemia provocada pola COVID-19 dependendo da situación sanitaria de cada zona. Dende o Proxecto Ríos recomendan que os grupos sexan de 10 persoas como máximo e se respecte sempre que sexa posíbel unha distancia de 1,5 m. O uso de máscara será de obrigatorio para todas as persoas participantes. Cada persoa voluntaria deberá levar as súas propias luvas.

Outros artigos

Este xoves arrinca a décima edición do Rexenera Fest

O certame Rexenera Fest 2024, o gran festival da arte pública de Galicia que chega á súa décima edición, celébrase en Carballo do 30 de maio ao 9 de xuño. Organizado polo departamento de Promoción Económica e Turismo do Concello carballés, volverá contar co apoio da...

+

Publicidade

Revista en papel

Opinión

“Cando existen intereses contrapostos na pesca”. Antón Luaces

“Cando existen intereses contrapostos na pesca”. Antón Luaces

Dicirmos que hai diverxencia entre o sector pesqueiro e os gobernos (autonómico e/ou central) non é descubrir, arestora, o Atlántico. Resulta tan evidente ese desencontro, que só a desunión permanente no eido da pesca marítima explica que o sector, en Galicia e as...