O Concello da Pobra do Caramiñal informou do remate dos traballos para o mantemento e o acondicionamento do céspede artificial do campo de fútbol de Cadreche de cara á actual tempada deportiva. Os labores desenvolvidos, tal e como fixo saber a Concellaría dos Deportes, enmárcanse no plan local para a mellora das instalacións deportivas no segundo semestre do ano. O obxectivo é “ofrecer aos usuarios e usuarias unhas mellores condicións para o desenvolvemento da súa actividade”.
A dita intervención foi executada por Jardinería Arce e comporta un investimento de 4.585’90 euros, IVE incluído.
O proxecto supuxo o mantemento do céspede artificial, “consistente na limpeza da superficie mediante a aspiración do infill con verti-top, no descompactado do caucho con verti-groom, na cepilladura da fibra con verti-brush e no acabamento coa esteira, na inspección de liñas e xuntas, ademais de aplicar herbicidas para a retirada de malas herbas”. Tamén se efectuou o subministro de caucho negro para, deseguido, estendelo para o recheo do céspede artificial mediante a carga, así como cunha recebadora específica acoplada a un tractor.
