A Marea Cidadá de Noia vén de informar de que as súas peticións sobre as melloras para a Biblioteca Municipal deron froito e xa conseguiu o compromiso do Goberno local para destinar 17.000 euros a tal fin: a posta a punto das ditas instalacións. Segundo lembra a agrupación, os requirimentos para acondicionar o dito espazo cultural e emendar os seus “graves problemas estruturais” son peticións que veñen de antigo. “Noia é unha vila que conta con dous IES que acollen a estudantes dos concellos limítrofes, e non pode permitirse contar cunha biblioteca que presenta problemas tan graves”, explican dende a Marea Cidadá.
A agrupación engade que a dotación irá destinada a solucionar os problemas de illamento das portas e a instalar aire acondicionado na biblioteca. Malia os traballos previstos para poñer a punto o espazo cultural, a Marea Cidadá continuará “pulando pola construción dun edificio novo, que dea saída a todas as demandas das veciñas, que sexa accesíbel para todos e todas e que permita a realización de actividades lúdico-educativas para cativos e cativas no seu interior”.
