O coñecido grupo vigués Broken Peach vai actuar o sábado 29 no paseo Plácido Betanzos de Palmeira cun concerto que se integra dentro da programación da Fiestra de Cultura. Así se deu a coñecer esta mañá dende a Concellería que dirixe a edil María Sampedro, redondeando unha última fin de semana de agosto que traerá ademais música, autocine e contacontos a outros puntos do municipio ribeirense.
Fundada en 2009, Broken Peach é unha banda caracterizada por fusionar diversos estilos (como soul, rock, funk, pop ou gospel) cunha esmerada posta en escena. Nas redes sociais son todo un fenómeno, con máis de 86.000 suscriptores en YouTube e vídeos aloxados nesta canle que nalgún caso superan os 3,8 millóns de visualizacións (en concreto, This is Halloween de Tim Burton para Pesadelo antes de Nadal: https://www.youtube.com/watch?v=YNiI6C0142g).
Broken Peach actuará no paseo palmeirense ás 22.15 horas. O aforo é limitado en recinto acoutado e a entrada, por rigorosa orde de inscrición. A mascarilla será obrigatoria.
Outros eventos
Por outra banda, cómpre lembrar que o calendario de eventos comezará xa o venres ás 22.15 horas co Autocine de Verán que recala en punta do Castro en Castiñeiras. Proxectarase o filme “La gallina Turuleca) e o aforo estará limitado a 20 vehículos.
Xa o sábado e por iniciativa da Concellería de Educación e o Servizo Municipal de Normalización Lingüística terá lugar unha sesión contacontos para pequenos e maiores na Porta do Sol de Ribeira a cargo de Fran Rei e a súa proposta “A historia de Brancaflor”. Dará comezo ás 12 do mediodía.
Ás 22.15 horas, no mesmo emprazamento fronte á igrexa de Santa Uxía, terá lugar un concerto de Gramola Yé Yé incluído dentro da programación da Fiestra da Cultura. O aforo é limitado e a mascarilla obrigatoria.
O programa concluirá o domingo 30 de agosto cun concerto de Aliaxe no paseo do Malecón de Ribeira que se adscribe ás Rúas Musicais que están xirando por todas as parroquias do concello. A actuación dará comezo ás 13 horas.
