O puxante panorama musical boirense ofrécenos unha finde de folk galego e rock

A semana cultural do Concello de Boiro será unha semana musical. O programa inclúe dúas citas na mesma xornada, a do 22 de agosto, en emprazamentos diferentes. Por unha banda está prevista a celebración, a partir das 20.00 horas en Cespón, da cuarta convocatoria do Encontro Tradicional en San Roque. Contarase coa presenza do Grupo Abeloura, a histórica agrupación local de música popular galega, Xisco Feijóo & Trío, Os Liantes, As da Canteira, Os Centenarios e Rianxeiras da Covecha. Segundo nos conta o Concello, colaborador da cita organizada por Abeloura, as prazas dispoñíbeis son limitadas e para reservar sitio cómpre poñernos en contacto coa organización a través da conta cabodecruz@boiro.org, antes do venres ás 13.30 horas.

A banda rockeira boirense Triángulo de Amor Bizarro

A outra gran actuación da semana en Boiro vén da man doutro conxunto local, aínda que de estilo ben diferente: o grupo de rock Triángulo de Amor Bizarro. A cita será na praia da Pesqueira de Cabo de Cruz, ás 20.00 horas do sábado 22. Trátase dunha das catro actividades programadas na iniciativa Paisaxes Sonoras que promove a mancomunidade Barbanza Arousa.

As entradas están esgotadas.