A Casa Consistorial de Ribeira alberga dende esta semana unha nova exposición formada por 35 gravados á auga forte do recoñecido artista galego Manuel Facal. Os fondos, precedentes do Museo do Gravado de Artes e englobados baixo o título Obra Gráfica, comprenden a evolución entre os anos 1973 e 2005 do creador nado en Carballo en 1943.
Segundo informou o Concello, aquelas persoas que se acheguen estes días até o Consistorio terán a oportunidade de contemplar “unha reveladora mostra do talento deste artista”, un creador de sona internacional que ten exhibido a súa obra en cidades como Nova York ou Londres e en países como Noruega, Porto Rico, Bélxica ou Holanda, ademais de numerosas localidades da xeografía galega e española.
Tendo en conta a situación actual derivada da COVID-19, a organización optou por non organizar acto de apertura. Malia así, no remate da colocación dos cadros alí estiveron a concelleira de Cultura María Sampedro, o director do Museo do Gravado Pastor Rodríguez e María José Carreira, comisaria da exposición.
