O Concello de Boiro vai extremar as medidas de seguridade en San Ramón de Bealo, coincidindo cos festexos tradicionais desta parroquia boirense e co obxectivo de asegurar o distanciamento da xente e evitar aglomeracións. A xeito de iniciativas concretas, evitaranse as acampadas durante a fin de semana e controlarase a afluencia de fregueses á contorna da ermida o día 31 de agosto, festivo local en Boiro.
Tamén estarán prohibidos, para garantir a seguridade sanitaria da cidadanía, os postos de restauración e hostalaría e as atraccións. Para garantir que estas restricións se cumpran, a Policía Local vai intensificar durante a fin de semana o control e a vixilancia da zona.
O Concello lembra que “aínda que non hai festexos”, o vindeiro luns 31 de agosto celebraranse as tradicionais misas na ermida. Haberá oficios pola mañá ás 8.00 horas, ás 9.00 horas, ás 10.00 horas, ás 11.00 horas, ás 12.00 horas e ás 13.00 horas. Pola tarde haberá misa ás 21.00 horas. Como cada ano vanse sinalizar os accesos á ermida para evitar que se formen atascos nas entradas e saídas e controlar o estacionamento de vehículos. O Concello intensificará o control e a vixilancia para que se respecten as restricións sanitarias de uso de máscara e distanciamento social e previr contaxios.
